Ami i fidju di Agricultor

Por Papa Jomav 

Ná da nha contribuison suma um fidju di agricultor ou seja, suma um cidadon qui gosta di odja si povo, na vivi diritu.

Ami n'gosta di apoia agricultoris, pabia n'sai na rágas di Agricultor, n'ka pudi fika di boca fitchadu ná é mumento ku nô padiduris na sufri ná tabancas.

N'sinta pa scribi sobri situação di preço di cucu di cadju ki publicado publicamente pa guberno, más ami na pidi guberno, páh é pui guintis na Interior di país, pabia i tem manga dí intermediarios ku na kumpra cucu menus 375 fc, i pirxis pa guberno firma pá é guintis.

Nô ermonsis agricultoris ka bô seta bindi cucu menus 375 fc, nô sibi ika dí bô vontade í nin ika dí vontade dí guberno pá cucu kumpradu na 375 fc, más si nô refletí, nô kumpanha que kí na passa na mundo awos econômicamente nó ka na kulpa é atual guberno, pabia Impresarios estrangueiros ka na bim pa kumpra cucu atravez di é doença #Covic19 qui toma konta di mundo.

Mas pirxis pá purmeiro Magistrado di nação usa si influência, djunta á guberno pá controla guintis ku ná kumpra cucu menus 375 fc, pabia guberno sibi kal koldadi di intermerdiarios, ku nô tene na sector privado, e guintis ku ka ta misti pirdi nin um duchilin na se comercialição, elis é pirfiri povo passa fomi pa se econômia aomenta.

Dipus guberno tem qui cria um grupo di jovens kuna saí di Ministerio di Comercio à cumpanhadu qui Policias di Ordem Publica, pa isplica nó populações kal ki motivo ku pui preço di cucu pudu 375 fc, dipus pa Ministerio Comercio pui mididas duru pa djintis ku na viola preço ku pudu pa guberno.

Nô ermonsis #Campunesis ka bô seta bindi bô cucu menus 375 fc, di facto ika és qui era báh disidju di é nobu guberno, más djitu ka tem quil ki Deus kargantau ninguin ka pudi riantau él si ka qui mesmo Deus ku riantau él.

É doença na tissi purbulema econômica na mundo, és i ora di nô ranka labra pa nô racada pabia nim um país ka na dissa si terra pa djuda utru terra .

General Umaro Sissoco Embalo Presidente di Republica di Guine Bissau, tene fé qui coragem bu kontinua pidi Deus pa i salvaguarda bu povo di é doença.

Papa Jomav