Ora ki eleiçon tchiga, politikus ku partidus ta bai patiu carrus, motas, bicicletas, geradores, zincos, sacus di arruz, camisolas, bolas, sapatus, sapatilhas, etc., etc.
Bu kata punta elis nunde ku êh sai ku kil kussas tudu. Bu ta toma son. Bu ta vota na elis. Êh ta n'ganha. Portantu, bu bindi bu votu. Livremente.
Suma bu bindi bu votu,
Bu ka pudi exigi hospitais, enfermeiros, médicos, escolas, pursoris, estradas, iagu, luz, etc., etc. I suma nô bindi nô votos, anôs ku seta/promovi corrupçon purmeru.
Dia ku nô kunsa dá prioridadi pá kussas mais importantis pa tudu djintis, Guiné na muda.
És responsabilidadi sta na nô chefis religiosos, imamis, chefis tradicionais, régulos, homis ku mindjeris garandis, jovens, formadus, intelectuais, etc.
Pubis di Guiné, nô pára pidi kussas passageirus. Nô kunsa pensa na país. Nô pára pui dinheru ku material riba di cabeças di fidjus di Guiné.
Nô kunsa invisti na futuru di Guiné-Bissau. Nô para bindi nô futuru ku motas, bicicletas, zincos, camisolas, etc.
Nô educa nô djintis pabia di amanhã. Bô fala elis kuma pá éh ka bindi futuru di sêh fidjus.
Di fabur, nô educa nô djintis... pabia di amanhã.
14 de Maio de 2018
Umaro Djau
Sem comentários:
Enviar um comentário
Nota: só um membro deste blogue pode publicar um comentário.